Identikiti i vrasësit/ Me kapuç, pantallona të errëta dhe atlete me gomë të bardhë

Grupi hetimor i ngritur për vrasjen e Edmond Papës ka krijuar një identikit të autorit. Ai është kujdesur mos ekspozohet në kamerat e sigurisë, megjithëse është pikasur teksa largohet me vrap.

Trup mesatar, i veshur me një xhup të zi me kapuç, pantallona të errëta dhe atlete me gomë të bardhë. Është ky përshkrimi i vrasësit të Edmond Papës në zonën e Selitës në kryeqytet, pasditen e së premtes.

Hetuesit e krimeve kundër personit kanë krijuar një identikit të vrasësit i cili gjakftohtë është larguar me vrap përmes rrugicave pasi qëlloi disa herë më pistoletë mbi 49-vjeçarin në brendësi të lokali.

Rruga ‘Fadil Bodinaku’ rezulton e varfër sa i takon kamerave të sigurisë, megjithatë autori që dyshohet rreth të 30-tave, është pikasur në disa momente. Dyshimet janë që viktima është ndjekur prej disa ditësh, jo vetëm në Tiranë por edhe në Sarandë.

Atentatori ka pasur dijeni për lëvizjet e 49 vjeçarit i cili ndërroi jetë në spitalin e traumës. Lidhur me motivet dyshimet kryesore janë se Papa, mund të ketë qenë i përfshirë në aktivitete të paligjshme në Britaninë e Madhe por edhe Greqi ku rezulton i dënuar për trafik droge.

Papa, ishte pronar i një hoteli në Sarandë ku jetonte shumicën e kohës ndërsa në Tiranë kishte mbërritur për shoqëruar të ëmën në spital për vizita mjekësore.

LEXONI GJITHASHTU: 

• U vra brenda lokalit në Tiranë, ky është 49-vjeçari Edmond Papa (FOTO)
• Vrasja në Tiranë, 49-vjeçari me precedentë penal, i dënuar në Greqi për drogë