Impianti bërthamor turk, bashkëpunimi turko-rus, Putin e Erdogan përshëndesin nisjen e punimeve

Presidenti turk Erdogan dhe homologu i tij rus Vladimir Putin u zotuan të forcojnë më tej bashkëpunimin ndërsa përshëndetën nisjen e punimeve për ndërtimin e reaktorit të tretë në termocentralin e parë bërthamor të Turqisë.

Të dy udhëheqësit zbuluan fazën e re të projektit të Centralit Bërthamor të Akkuyu në një ceremoni në të cilën ata morën pjesë online nga zyrat e tyre në Ankara dhe Moskë. Impianti shënon një projekt të përbashkët energjetik që dy liderët thanë se simbolizon një partneritet të fortë midis dy vendeve.

Të dy vendet nënshkruan një marrëveshje bashkëpunimi në 2010 dhe filluan ndërtimin e parë nga katër reaktorët e planifikuar në 2018. Kostoja totale e projektit, vlerësohet në 20 miliardë dollarë.

Presidenti turk tha se reaktori i parë i uzinës është planifikuar të bëhet operacional në vitin 2023. Erdogan shtoi se shpejt pritet të nisë edhe ndërtimi i njësisë së katërt dhe se projekti pritet të sigurojë 10% të energjisë elektrike të Turqisë.