Indeksi i Korrupsionit| Shqipëria në vendin e 98, në rajon kryeson Mali i Zi

Shqipëria është ngjitur me një pikë plus në indeksin e Perceptimit të Korrupsionit për vitin 2023. Sipas Transparency International, vendi ynë vlerësohet me 37 pikë nga 36 që kishte në vitin 2022, dhe tashmë renditet në vendin e 98 në rang global.

Krahasuar me rajonin, Shqipëria lë pas Serbinë dhe Bosnjë Herzegovinënë, ndërsa hapat më të mira në këtë drejtim i ka hedhur Mali i Zi dhe Maqedonia e Veriut. Megjithatë, duhet theksuar, se asnjë prej shteteve të Ballkanit Perëndimor nuk ka humbur pikë në raport me vitin 2022.

Ndërkohë, Korrupsioni shihet si një fenomen në rritje në kontientin europian, në pjesën më të përparuar të tij në perëndim dhe në shtetet e Unionit.

Të dhënat e krahasuara me vitet paraardhëse, tregojnë se kjo është hera e parë që indeksi përkeqësohet në më shumë se një dekadë, ku demokraci të rangut të lartë, si Suedia, Holanda, Islanda dhe Mbretëria e Bashkuar shënuan rezultatet e tyre më të ulëta ndonjëherë.

Sipas raportit, 3 vendet më pak të korruptuar në botë janë Danimarka, Finlanda dhe Zelanda e Re, ndërsa në fund të listës qëndrojnë Siria, Venezuela dhe Somalia.

Transparency International shqyrton 180 shtete, sipas niveleve të tyre të perceptuara të korrupsionit në sektorin publik në një shkallë nga zero deri në 100 pikë.

LEXONI GJITHASHTU:

• Pse na kushton shëndetësia? Mjeku: Ka korrupsion, shqiptarët paguajnë çdo gjë
• Indeksi i korrupsionit, TI: Shqipëria ka fituar pikë nga sistemi i drejtësisë