Infektologu Salih Ahmeti për COVID-19 në Kosovë: Përhapja e coronavirusit varet nga respektimi i masave prej qytetarëve

Infektologu Salih Ahmeti nga Prishtina tha për Euronews Albania që ekziston mundësia që Kosova të ketë një numër më të lartë të rasteve me COVID-19 të cilët ende nuk janë identifikuar.

“Këta persona eventualisht mund të jenë ende pa simptoma, në fazën e inkubimit të tyre dhe që mund të manifestojnë sëmundjen në ditët e ardhshme,” tha z. Ahmeti gjatë intervistës me gazetaren Ilva Tare në studion e Ilva Now.

Ditën e mërkurën Kosova shënoi 20 të prekur nga coronavirusi.

“Ekipet tona epidemiologe po bëjnë testime në terren në mënyrë që këto vatra t’i lokalizojnë sa më tepër dhe sëmundjen ta detektojnë sa më parë në mënyrë që efekti i përhapjes së virusit të ngushtohet,” shtoi infektologu Ahmeti.

Pyetur lidhur me parashikimin e tij për numrin e të infektuarve në vend, mjeku tha se ishte e vështirë të parashikohej dhe se kjo varej edhe nga respektimi i masave nga ana e qytetarëve.