Inflacioni vjetor pritet të shkojë në 4,5%, parashikon ministrja e Ekonomisë

“Presim që rritja ekonomike të luhatet në nivelin 3,2 deri në 3,5 %”.

Kështu parashikoi ministrja e Ministria e Ekonomisë dhe Financave Delina Ibrahimaj gjatë një konference për mediat, ku nënvizoi se inflacioni vjetor pritet të shkojë në 4,5%.

Ajo nënvizoi se pritet që të ketë një rritje të inflacionit në muajt në vijim dhe për këtë arsye kanë rishikuar dhe të gjithë treguesit kryesorë makro-ekonomik të buxhetit.

“Kemi shkurtuar një pjesë të investimeve publike, rreth 9,8 mld lekë dhe një pjesë të shpenzimeve operacionale”, u shpreh Ibrahimaj.

Ministrja tha se “shifra më shqetësuese ka qenë rritja e inflacionit të ushqimeve dhe pijeve jo-alkoolike, e cila për shkurtin e këtij viti ka rezultuar 6,9% më e lartë sesa shkurti i vitit të kaluar”.

“Inflacioni për muajin shkurt ka rezultuar në 3,9% në krahasim më një vit më parë. Është një inflacion më i ulët në vendet rajonit. Çmimet në Shqipëri kanë qenë më të kontrolluara, duke qenë se çmimet e energjisë elektrike janë mbajtur të kontrolluara nga shteti dhe të pandryshuara”, u shpreh ajo.

LEXONI GJITHASHTU:

• Rriten me 33% çmimet e produkteve të shportës bazë
• Ulet me 8 lekë çmimi i naftës, vendimi i Bordit të Transparencës