Influencuesja meksikane qëllohet për vdekje teksa ishte live në TikTok

Një influencere 23-vjeçare nga Meksika është qëlluar për vdekje ndërsa transmetonte drejtpërdrejt në TikTok, tha zyra e prokurorit të shtetit.

Valeria Marquez u vra kur një burrë hyri në sallonin e saj të bukurisë në qytetin e Guadalajarës “dhe me sa duket qëlloi me armë drejt saj”, sipas zyrës së prokurorit të shtetit të Jaliscos.

Motivi për sulmin fatal nuk është identifikuar, por rasti po hetohet si femicid, kur gratë dhe vajzat vriten për shkak të gjinisë së tyre, tha prokurori i shtetit.

Dhuna me bazë gjinore është shumë e zakonshme në Meksikë, ku OKB-ja raporton se 10 gra ose vajza vriten çdo ditë nga partnerët ose anëtarët e familjes.

Pak momente para vdekjes së saj, Marquez ishte ulur në një tavolinë duke mbajtur një kafshë prej pelushi në sallonin e saj të bukurisë në periferi të Zapopanit duke bërë një lidhje “live” në Tik Tok.

Sekonda më vonë, ajo qëllohet për vdekje, dhe pamjet mbarojnë vetëm kur një person tjetër (një grua) merr telefonin e saj për të ndaluar regjistrimin.

Mediat lokale raportojnë se ajo u vra nga një burrë që pretendonte se i sillte një dhuratë.

Policia mbërriti në vendngjarje rreth orës 18:30 sipas orës lokale dhe konfirmoi vdekjen e znj. Marquez, sipas prokurorit të shtetit.

Zyra e prokurorit nuk e emëroi asnjë të dyshuar.

LEXONI GJITHASHTU:

• “PD ti kërkojë falje demokratëve”, gazetari: Retorika e Berishës mbetet e njëjtë
• Vrasja në Has pas sherrit për pronën, 41-vjeçari mori hak pasi i dhunuan prindërit