Instituti i Studimit të Luftës: Rusia po përgatitet për konflikt të gjerë me NATO-n

Disa tregues financiarë, ekonomikë dhe ushtarakë tregojnë se Rusia po përgatitet për një “konflikt konvencional në shkallë të gjerë me NATO-n”, ka thënë një organizatë kryesore.

Sipas mediave të huaja, Instituti për Studimin e Luftës (ISW) me bazë në SHBA thotë se një konflikt i tillë mund të ndodhë në një afat të shkurtër.

“Jo menjëherë, por me gjasë në një afat kohor më të shkurtër se sa disa analistë perëndimorë kanë parashtruar fillimisht”, thuhet nga ISW.

Ky Institut vuri në dukje se veprimet e Vladimir Putin gjatë viteve të fundit dhe fjalimet e fundit që përshkruan planet e tij për mandatin e tij të pestë të siguruar së fundmi si president, u fokusuan në stabilizimin e së ardhmes financiare afatgjatë të Rusisë.

“Përpjekjet e Putinit për të vendosur kushte për të stabilizuar ekonominë dhe financat e Rusisë janë me shumë gjasa pjesë e… përgatitjeve për një konflikt të mundshëm të ardhshëm në shkallë të gjerë me NATO-n dhe jo vetëm për një luftë të zgjatur në Ukrainë”, vlerësoi Instituti.

ISW iu referua komenteve të bëra nga presidenti polak Andrzej Duda dje, i cili tregoi se Rusia po kalonte drejt një ekonomie lufte “me synimin për të qenë në gjendje të sulmonte NATO-n që në vitin 2026 ose 2027”.

Ai gjithashtu vuri në dukje fjalët e ministrit danez të mbrojtjes, Troels Lund Poulsen, më 9 shkurt se “inteligjenca e re tregon se Rusia mund të përpiqet të sulmojë një vend të NATO-s brenda tre deri në pesë viteve”.

Ristrukturimi ushtarak dhe ndryshimet e legjislacionit, i hapin rrugën suksesit afatshkurtër në Ukrainë dhe e përgatisin Rusinë për një konfrontim me NATO-n në të ardhmen, tha ISW.

“Ndryshimet e vazhdueshme të personelit brenda Ministrisë së Mbrojtjes së Rusisë mund të jenë tregues të mëtejshëm të përgatitjeve të Rusisë për një konflikt në planin afatgjatë,” shtoi ai.

Udhëheqja e re do të trajtojë “çështjet logjistike për të mbështetur reformat e vazhdueshme ushtarake konvencionale, duke vendosur kushte për përpjekjet afatgjata për të ndërtuar aftësitë konvencionale të Rusisë”.

LEXONI GJITHASHTU:

• Rusia sulmon me raketa Kievin, raportohet për disa të plagosur
• Rusia kërcënon Francën: Do ju shkatërrojmë, gjelat në gijotinë