Integrimi i emigrantëve, KE harton planin e veprimit

Komisioni Evropian ka ndërmarrë një plan veprimi për integrimin e emigrantëve. Por vendet anëtare e kanë bërë të qartë se propozimi përfshin ata që kanë të drejtë qëndrimi dhe se duhet të jetë një proces i dyanshëm, që kërkon përpjekje nga personi dhe komuniteti pritës.

“Duhen 2 vetë për të kërcyer tango. Pritshmëritë duhet të vijnë nga të dyja palët. Të gjithë kanë të drejta dhe kushdo ka detyrime”, deklaroi Ylva Johansson, komisionere e BE për Punët e Brendshme.

Komisioni ka identifikuar 4 fusha ku duhet vepruar dhe janë pikërisht ato ku diskriminimi verifikohet më shpesh: Arsimi, ku do të kërkohet promovimi i kualifikimit; Punësimi, me punëmarrësit që do të angazhohen për përfshirjen e emigrantëve; Shëndetësia, me autoritetet që do lehtësojnë aksesin; Dhe strehimi, i cili do të duhet të jetë i përballueshëm. Gjithashtu ka dhe një kapitull kushtuar integrimit të grave.

Sot, rreth 34 milionë banorë lindën jashtë BE-së, që përbëjnë 8 për qind të popullsisë. KE mendon se emigracioni është i nevojshëm në aspektin ekonomik, pasi popullësia evropiane po plaket, por shton se integrimi është jetik për kohezionin.

“Integrimi dhe përfshirja ndihmojnë në luftimin e ksenofobisë, përjashtimit, radikalizmit dhe mentalitetin ‘ne kundër atyre’. Duhet të ndërtojmë respekt reciprok dhe t’u japim emigrantëve një sens përkatësie”, deklaroi Margaritis Schinas, zv.president i KE për Stilin Evropian të Jetesës.

Për organizatat që punojnë me emigrantët, plani është pozitiv, por ka mungesë detyrimesh ligjore dhe nuk është mjaftueshëm konkret.

“Ambicja është aty, fjalët janë po ashtu, ata duan ta ndryshojnë, ta bëjnë më përfshirës. Por si? Si të sigurohemi që përfaqësimi i refugjatëve dhe emigrantëve të bëhet në mënyrë domethënëse? Si të sigurohemi që barazina gjinore do respektohet? Pra, pyetja “si” është shumë e madhe”, u shpreh Anila Noor, drejtoreshë e OJQ-së Lidhja e Grave.

Plani do të sigurojë fonde dhe udhëzime për shtetet anëtare. Përmbushja e paktit për Emigracionin dhe Azilin do të kërkojë gjithashtu më shumë kontrolle kufitare dhe riatdhesime.