Inteligjenca artificiale, produkti i “Google” zbarkon në BE

Kompania mëmë e “Google”, “Alphabet” po shpalos versionin e saj të inteligjencës artificiale të quajtur “Bard” në Evropë dhe Brazil.

Bëhet fjalë për ekspansionin më të madh që prej daljes në treg në mars në Shtetet e Bashkuara dhe Britani i rivales “Chat GPT” të “Microsoft”.

Të dyja produktet janë shembuj të Inteligjencës Artificiale gjenerative që mund t’u përgjigjen pyetjeve sikur të ishin njerëz.

Zbarkimi i “Bard” në BE ishte pezulluar pasi enti rregullator i të dhënave të bllokut kishte ngritur shqetësime për privatësinë.

Komisioni Irlandez për Mbrojtjen e të Dhënave deklaroi se gjiganti i teknologjisë nuk kishte ofruar informacion të mjaftueshëm mbi mënyrën se si mjeti i tij i inteligjencës artificiale do të mbronte privatësinë.

Por ditën e enjte kompania ka deklaruar se që prej kërkesës së entit mbikëqyrës ka përmbushur kriteret që lidhen me transparencën, zgjedhjen dhe kontrollin.

Në një takim me gazetarët, zëvendës presidenti i “Bard” saktësoi se përdoruesit do të mund të zgjedhin nëse të dhënat e tyre do të mblidhen apo jo.

Por ai refuzoi të komentonte nëse kompania kishte në plan të zhvillonte një aplikacion për këtë produkt të inteligjencës artificiale.

LEXONI GJITHASHTU:

• Inteligjenca Artificiale mund t’u kursejë punonjësve rreth 390 orë kohë pune në vit
• Inteligjenca Artificiale mund t’i japë fund klasave tradicionale të mësimdhënies