Interi kalon në gjysmëfinalen e Kupës, Empoli sfidon Juventusin

Interi ka mposhtur pa vështirësi Lazion, duke u kualifikuar në gjysmëfinalen e Kupës së Italisë, aty ku e pret Milani. Në mbrëmje, një biletë kërkon edhe Juventus, që sfidohet nga Empoli.

Derbi i Madoninës, përballja historike mes Interit dhe Milanit, është një prej gjysmëfinaleve të Kupës së Italisë, pasi zikaltrit mposhtën Lazion në stacionin parardhës. Më pas, vetëm një prej ekipeve të Milanos do të arrijë finalen e madhe dhe do të synojë fitimin e trofeut.

Edhe pse me shumë ndryshime në formacion nga ana e Simone Inzaghit, Interi nuk e pati aspak të vështirë të kalonte pengesën Lazio, të cilën e mposhti me shifrat 2-0.

Pjesa e parë u mbyll me golin e Arnautovic, me austriakun që realizoi një perlë në stilin volej, pa e lejuar topin të prekë tokën. Në pjesën e dytë, një ndërhyrje e parregullt ndaj Correas solli penallti në favor të milanezëve, të cilën e shndërroi në gol turku Hakan Calhanoglu. Kaq mjaftoi që Interi të kalonte më tej, ku e pret rivali i përbetuar, Milani.

Një biletë është ende në dispozicion, ku gara është mes Juventusit dhe Empolit, me bardhezinjtë që janë favoritë për kalimin më tej. Në Allianz Stadium, vendësit do të kërkojnë ta mbyllin gjithçka në 90’, pasi duelet e Kupës së Italisë janë me ndeshje teke. 6 lojtarë nuk janë në dispozicion të teknikut Motta, por kundërshtari nuk duket problematik, pasi ka pësuar 4 humbje radhazi. Në dyshim tek Empoli është qendërmbrojtësi shqiptar Ardian Ismajli.

LEXONI GJITHASHTU:

• Milani eliminohet nga Liga e Kampionëve, kualifikohet Feyenoordi
• Çerekfinalet e kupës së Italisë, Milani përballet me Romën