Irani dënon urdhrin e Trump për testet e armëve bërthamore

Irani ka dënuar urdhrin e Presidentit të SHBA-së Donald Trump drejtuar Pentagonit për të filluar testimin e armëve bërthamore duke e quajtur atë “të papërgjegjshëm” dhe duke thënë se ai përfaqëson një “kërcënim serioz për paqen dhe sigurinë globale”.

“Njoftimi për të rifilluar testimin e armëve bërthamore është një veprim prapaveprues dhe i papërgjegjshëm, një kërcënim serioz për paqen dhe sigurinë globale”, tha Ministri i Jashtëm iranian Abbas Araghchi në një postim në platformën X.

“Bota duhet të bashkohet për t’i mbajtur SHBA-të përgjegjëse për normalizimin e përhapjes së armëve të tilla të urryera”, shtoi ai.

Ai gjithashtu thekson se SHBA-të po demonizojnë programin bërthamor të Iranit dhe po kërcënojnë objektet bërthamore të vendit të tij me sulme të reja.

“Duke e riemëruar “Ministrinë e Mbrojtjes” në “Ministrinë e Luftës”, një ngacmues i armatosur me armë bërthamore po rifillon testet e armëve bërthamore.

I njëjti ngacmues po demonizon programin bërthamor paqësor të Iranit dhe kërcënon me sulme të reja ndaj objekteve tona të mbrojtura bërthamore, në shkelje flagrante të së drejtës ndërkombëtare”, vëren kreu i diplomacisë iraniane.