Irani kundërshton lidhjen me objektivat e goditura në Siri, dënon sulmin izraelit

Zëdhënësi i Ministrisë së Jashtme të Iranit ka hedhur poshtë raportet e mediave izraelite se një objekt i lidhur ose i mbështetur nga Irani ishte objektivi i sulmeve izraelite në Siri që vranë të paktën 16 persona dhe u plagosën 36.

“Ajo që kanë njoftuar burimet zyrtare nga qeveria siriane është se ka pasur sulme në disa objekte siriane, duke përfshirë një sulm në një qendër kërkimore të lidhur me Ministrinë e Mbrojtjes dhe ushtrinë siriane”, u tha Nasser Kanaani gazetarëve gjatë një konference për shtyp.

“Ne e dënojmë këtë agresion kriminal në termat më të ashpër të mundshëm”.

Izraeli është zotuar për të parandaluar shtrirjen e Iranit në Siri, sidomos për faktin se Siria përbën rrugë kyçe për Iranin për transportim të armëve te grupit militant i Libanit, Hezbollahu.

Hezbollahu është përleshur me forcat izraelite në 11 muajt e fundit, duke i konsideruar veprimet e veta si shenjë solidarizimi me Hamasin që po lufton kundër Izraelit në Gazë, shkruan REL.

Lufta në Gazë është nxitur prej sulmeve të militantëve të Hamasit në jug të Izraelit në tetor të vitit të kaluar, duke vrarë mbi 1.200 njerëz dhe duke marrë peng mbi 240 të tjerë.

Sulmet hakmarrëse të Izraelit në Gazë kanë lënë mbi 40.000 palestinezë të vrarë, sipas autoriteteve shëndetësore palestineze.

Kombet e Bashkuara vlerësojnë se shumica e të vrarëve janë gra dhe fëmijë.

LEXONI GJITHASHTU:

• Të paktën 14 persona kanë vdekur nga sulmet izraelite në Siri
• Gruaja e parë në krye të ushtrisë kanadeze, ka komanduar në Afganistan, Irak e Siri