Irani mohon pretendimet e Trump për negociata: Nuk ka bisedime mes palëve!

Iran ka mohuar pretendimet e presidentit amerikan Donald Trump për ekzistencën e bisedimeve mes dy vendeve.

Zëdhënësi i Ministrisë së Jashtme iraniane, Esmail Baghaei, deklaroi se nuk ka asnjë negociatë në zhvillim me Shtetet e Bashkuara.

Baghaei akuzoi SHBA-të për “tradhti të diplomacisë”, duke pretenduar se Irani është sulmuar ndërsa ishte i përfshirë në një proces negociues.

“Dje e kemi bërë të qartë se nuk ka bisedime apo negociata midis Iranit dhe Shteteve të Bashkuara. Kemi pasur një përvojë shumë katastrofike, duhet të them, të diplomacisë së Shteteve të Bashkuara. U sulmuam dy herë brenda një hark kohor prej nëntë muajsh, kur ishim në mes të një procesi negociues për të zgjidhur çështjen bërthamore. Pra, kjo ishte një tradhti e diplomacisë”, tha ai.