Irani raketë drejt Turqisë, reagon Tirana zyrtare: Solidaritet të plotë me aleatin tonë

Tirana zyrtare ka reaguar pas sulmit me raketë balistike të Iranit në hapësirën ajrore të Turqisë, e cila u neutralizua nga sistemet e mbrojtjes ajrore të NATO-s.

Ministria për Evropën dhe Punët e Jashtme thekson se Shqipëria qëndron në solidaritet të plotë me Turqinë, aleatin e saj në NATO dhe partner strategjik.

Në reagimin e saj, ministria mirëpret ndërhyrjen e menjëhershme të kapaciteteve ajrore dhe kundër-raketore të Aleancës, të cilat garantuan neutralizimin e raketës dhe mbrojtjen e popullsisë civile dhe territorit të NATO-s.

“Shqipëria qëndron në solidaritet të plotë me Turqinë, Aleati ynë në NATO dhe partner strategjik. I mirëpritur reagimi i menjëhershëm i kapaciteteve të mbrojtjes ajrore dhe kundër-raketore të NATO-s, të cilat neutralizuan raketën balistike dhe mbrojtën popullsinë civile, si dhe territorin e Aleancës. Sulmet e papërgjegjshme të Iranit rrezikojnë të destabilizojnë më tej rajonin. Një mbrojtje e fortë dhe aftësitë parandaluese mbeten thelbësore për sigurinë kolektive të NATO-s”, thuhet në deklaratë.