“Irani sponsor i terrorizmit”, reagon Kryetari i Knessetit të Izraelit mbi votimin: Udhëheqja juja një shembull

Kryetari i Knessetit izraelit, Amir Ohana, ka reaguar pas vendimit të Kuvendit të Shqipërisë për të shpallur Iranin si shtet sponsorizues të terrorizmit, duke vlerësuar qëndrimin e Tiranës zyrtare.

Përmes një postimi në rrjetin social X, Ohana ka përgëzuar kryeministrin Edi Rama dhe ligjvënësit shqiptarë për atë që e cilëson si një vendim të guximshëm dhe me bazë të fortë morale, duke nënvizuar rëndësinë e tij në raport me zhvillimet ndërkombëtare.

“Udhëheqja juaj vendos një shembull të rëndësishëm për komunitetin ndërkombëtar. Faleminderit”, thekson kryetari i Knessetit.

Reagimi vjen një ditë pasi Kuvendi miratoi rezolutën që e cilëson Iranin si shtet që mbështet terrorizmin, duke e renditur Shqipërinë ndër vendet që kanë ndërmarrë një hap të tillë në nivel global.

Rezoluta u miratua me shumicë të theksuar votash, pas një nisme të ndërmarrë nga mazhoranca, ku theksohet se Irani përdor metoda terroriste për të avancuar objektivat e tij në politikën e jashtme.