Ish-ministri danez dënohet për pornografi me fëmijë

Ish-ministri i qeverisë daneze Henrik Sass Larsen u dënua sot me katër muaj burg për posedimin e mijëra fotografive dhe videove të abuzimit seksual të fëmijëve.

Ai i mohoi akuzat, duke pretenduar se e zotëronte materialin sepse po përpiqej të zbulonte se kush e kishte abuzuar në fëmijërinë e tij, raportoi Euractiv.

Sass Larsen, një ish-socialdemokrat i cili ishte ministër i Industrisë, pranoi se kishte mbi 6,000 foto dhe 2,000 video të dhunës seksuale ndaj fëmijëve në kompjuterin e tij.

Prokurorja Maria Cingari tha se ishte e kënaqur me vendimin, por shtoi se ishte e trishtueshme që dikush që arriti maksimumin në jetë pavarësisht një fëmijërie të vështirë, e gjeti veten në një situatë të tillë.

“Nuk duhet të zotërosh kurrë pornografi me fëmijë, pavarësisht arsyes”, shtoi ajo.

Gjatë gjyqit, ish-ministri 59-vjeçar, i cili u vendos në kujdestari si fëmijë përpara se të birësohej, tha se në vitin 2018 mori një link që e çoi në një video 50-vjeçare që tregonte se ai abuzohej seksualisht kur ishte tre vjeç.

Ai dëshmoi se në vitin 2020 mori një tjetër videoklip nga e njëjta periudhë në të cilën një vajzë trevjeçare u përdhunua në prani të tij. Sipas tij, të dy videot u zhdukën pasi i pa ai.

Ai shprehu keqardhje në gjykatë që nuk kontaktoi policinë kur mori pamjet filmike.

Skandali u zbulua në mars, pas të cilit ish-ministri u përjashtua nga Partia e tij Socialdemokrate, dhe kryeministrja Mette Frederiksen, nga e njëjta parti, tha se ishte e tronditur nga i gjithë rasti.

LEXONI GJITHASHTU:

• Kryeministrja daneze: Presioni i SHBA mbi Groenlandën i papranueshëm, nuk dorëzohemi
• Danezët reagojnë ndaj komenteve të Trump për Groenlandën