Ishte arrestuar për drogë| U ankua se nuk ndihej mirë, vdes i burgosuri nga Lezha

Një i burgosur në burgun e Reçit në Shkodër, shtetasi Eduard Gjon Koka nga Lezha ka ndërruar jetë teksa ishte transportuar në spitalin e qytetit.

Lajmin e ka bërë të ditur Ministria e Drejtësisë përmes një njoftimi, ku thuhet se Koka ka ndërruar jetë rreth orës 07:45 të mëngjesit të sotëm në spital, pasi më herët ishte ankuar se nuk ishte ndierë mirë.

Ai ishte arrestuar për veprën penale ‘prodhimi dhe shitja e narkotikëve’ dhe sipas Ministrisë, në kartelën e tij mjekësore nuk referohen probleme shëndetësor.

Ndërkohë autoritetet po vijojnë hetimet për të zbuluar shkakun e ngjarjes.

Njoftimi i Ministrisë së Drejtësisë:

Sot, më datë 07.06.2024 në orën 07:45, i paraburgosuri në Institucionin e Ekzekutimit të Vendimeve Penale (IEVP) Reç-Shkodër, Eduard Gjon Koka ka ndërruar jetë në Spitalin Rajonal të Shkodrës. Në orën 06:30 të mëngjesit, i ndjeri është ankuar tek punonjësi i rolit bazë se nuk ndjehej mirë dhe se kishte probleme me frymëmarrjen. Menjëherë janë lajmëruar infermierët e turnit dhe është dërguar në infermieri i vetëdijshëm.

Duke parë gjendjen jo të mirë shëndetësore është nisur me urgjencë në Spitalin Rajonal të Shkodrës ku ka mbërritur rreth orës 07:15 dhe ka ndërruar jetë në ambientet e spitalit rreth orës 07:45.

Eduard Koka, i biri i Gjon dhe Mrike, lindur më 14.03.1979 në Reps, Mirditë dhe banues në Lezhë, ishte i martuar dhe i padënuar më parë. Ai ishte arrestuar më datë 02.04.2024 për veprën penale të “prodhimit dhe shitjes së narkotikëve” të parashikuar nga neni 283/1 i Kodit Penal. I ndjeri ishte akomoduar në IEVP Reç me datë 02.06.2024, i transferuar nga IEVP Lezhë. Në kartelën e tij mjekësore nuk referohen probleme shëndetësor.

Ngjarja është nën hetim nga autoritetet përkatëse. Drejtoria e Përgjithshme e Burgjeve dhe IEVP Reç i shpreh ngushëllimet familjes e të ndjerit dhe sigurojnë opinionin publik se do të bëjnë gjithçka për të garantuar sigurinë dhe mirëqenien e të burgosurve.

LEXONI GJITHASHTU:

• Mijëra të burgosur ukrainas kërkojnë t’i bashkohen ushtrisë
• Zelensky nënshkruan ligjin që lejon të burgosurit të shërbejnë në ushtri