Italia pre e vandalëve, turistë të padisiplinuar dëmtojnë trashëgiminë kulturore

Përveç fitimeve që i vijnë nga sektori i turizmit, Italia përballet shpesh edhe me akte të padëshirueshme nga vizitorët.

Së fundmi, veprimi i një turisti që dëmtoi një nga kryeveprat e artit shkaktoi zemërim në Firence. Bëhet fjalë për një shtetas gjerman që hipi në statujën e Neptunit, në sheshin Sinjoria të qytetit të Rilindjes për të bërë një selfie dhe që pa dashje dëmtoi këmbën e një kali.

Kryebashkiaku i Firences reagoi duke deklaruar se dëmi i shkaktuar arrinte koston e 5 mijë eurove. Akti vandal u filmua nga kamerat e sigurisë turisti u denoncua dhe u detyrua të paguante një gjobë.

Por kjo nuk është hera e parë që trashëgimia kulturore dhe historike e Firences dëmtohet. Më 23 gusht, dy turistë, sërish shtetas gjermanë, vizatuan disa grafiti në korridorin Vasari, një godinë 460-vjeçare.

Ndërkohë, në Romë, veprimi i një turisti bullgar që gdhendi emrin e tij dhe atë të të dashurës së tij në muret mijëravjeçare të Koloseut shkaktoi reagime të ashpra. Turisti, me banim në Britaninë e Madhe, rrezikon deri në 15 mijë euro gjobë dhe një vit burg.

LEXONI GJITHASHTU:

• Benz-i përplas motoristin në Qafë Thanë, plagoset turisti polak
• Performancë e kompozitorëve italianë në nder të shënjtërimit të Nënë Terezës