Ivi Kaso: Ka pasur parregullsi në procesin zgjedhor, të gjitha shkeljet të dokumentuara

Ivi Kaso, sekretar për çështjet zgjedhore i Partisë Demokratike tha për Euronews Albania se jo vetëm PD por dhe aktorë të tjerë që kanë monitoruar zgjedhjet, kryesisht nga shoqëria civile kanë vënë re shumë parregullsi në zgjedhje.

Sipas tij legjislacioni shqiptar në këto zgjedhje ishte përgatitur që në letër të parandalonte një pjesë të mirë të shkeljeve, gjë që nuk e ka ndaluar mazhorancën, siç sqaroi dhe Kaso të vërë të gjithë resurset dhe mjetet e shtetit në dispozicion të rezultatit final.

Sekretari i PD-së për çështjet zgjedhore tregoi gjithashtu se janë treguar shumë të kujdesshëm me monitorimin në ditën e zgjedhjeve dhe pas saj dhe në çdo zonë kanë përgatitur dosjen përkatëse me të gjitha shkeljet, dosje të cilat do i vihen në dispozicion Komisionit Qendror të Zgjedhjeve në kuadër të procesit ankimor.

“Ne synojmë atë që është detyrimi jonë karshi çdo shqiptari dhe veçanërisht ndaj zgjedhësve tanë, për të hedhur dritë mbi çdo aspekt të errët të këtij procesi zgjedhor të shoqëruar me manipulime të shumta,” – u shpreh Kaso.

Ivi Kaso pohoi se janë 180 kallzime penale që janë paraqitur në prokuroritë e rretheve, mbi 40 kallzime penale për procese të rënda të procesit zgjedhor janë depozituar në SPAK dhe gjithë shkeljet e tjera do i vihen në dispozicion agjencive ligjzbatuese.

Së fundmi Kaso theksoi se rezultati aktual është paraprak dhe duhet të kalojë fazën e ankimimit në mënyrë që të bëhet përfundimtat.

LEXONI GJITHASHTU:

• A duhet të largohet Basha nga drejtimi i PD? Komentojnë analistët
• Votat e partive të vogla, çfarë do të ndodhte nëse do të kishin garuar bashkë me PD
• PD: Qeveria ndau para për të dëmtuarit nga tërmeti javën e fundit të fushatës