Izraeli sulmon anëtarët e Hezbollahut afër kufirit me Libanit

Izraeli ka plagosur tre anëtarë të grupit militant të Hezbollahut – që mbështetet nga Irani – në një incident që ka ndodhur afër kufirit mes Izraelit dhe Libanit.

“Tre anëtarë të Hezbollahut janë plagosur nga zjarri izraelit pranë kufirit”, tha një burim për AFP-në, që foli në kushte anonimiteti, pasi nuk ishte i autorizuar për të folur për mediat.

Edhe burime të tjera kanë konfirmuar për AFP-në se janë në dijeni të incidentit ku mbetën të plagosur anëtarë të Hezbollahut.

Ndërkaq, ushtria izraelite tha përmes një deklarate se “një numër i personave të dyshuar iu afruan rrethojës së sigurisë në veri, afër Libanit dhe tentuan të sabotonin gardhin e sigurisë të vendosur në atë zonë”.

“Ushtarët menjëherë detektuan të dyshuarit dhe përdorën mjete për t’i larguar ata”, tha ushtria, duke shtuar se “identiteti i të dyshuarve mbetet i panjohur”.

Zona kufitare mes Izraelit dhe Libanit – ku ka bastionin Hezbollahu – është vend ku ndodhin incidente sporadike.

Izraeli dhe Hezbollahu kanë zhvilluar një luftë shkatërruese më 2006, pasi Hezbollahu kapi dy ushtarë izraelitë.

Incidenti i 12 korrikut vjen më pak se një javë që ushtria izraelite sulmoi jugun e Libanit, pasi dy raketa kundërtanke u lëshuan nga Libani dhe shpërthyen në zonën kufitare mes dy shteteve armike.