Izraeli vazhdon ofensivën në Gaza, zemërim  pas vrasjes së pengjeve

Izraeli vazhdon të çojë përpara ofensivën në Rripin e Gazës, ndonëse vrasja e tri pengjeve, që kanë qenë pa bluza dhe kanë mbajtur flamuj të bardhë, ka rritur pikëpyetjet për qasjen e tij në luftën 10-javëshe, e cila ka rezultuar me numër të madh vdekjesh dhe shkatërrim të enklavës.

Gaza vazhdon të jetë pa qasje në linja të komunikimit për të katërtën ditë me radhë, fakt që, sipas grupeve për ndihmë, i ka komplikuar përpjekjet për shpëtim, dhe për të regjistruar viktimat civile.

Izraeli mund të përballet me presion në rritje për ta ulur shkallën e operacioneve luftarake, kur Sekretari amerikan i Mbrojtjes, Lloyd Austin të vizitojë vendin këtë javë.

Uashingtoni ka shprehur shqetësim në rritje për numrin e të vrarëve dhe zhvendosjen masive të 1.9 milion palestinezëve – rreth 85 për qind e popullsisë së Gazës – ndonëse ka ofruar ndihmë të madhe ushtarake dhe mbështetje diplomatike për Izraelin, aleatin e tij të ngushtë.

Sulmet ajrore dhe tokësore kanë rrafshuar një pjesë të madhe të veriut të Gazës, dhe kanë shtyrë popullatën drejt jugut të Gazës, zonë ku banorët po jetojnë në kampe të improvizuara.

Zyrtarët ushtarakë kanë thënë të shtunën se tri pengjet janë vrarë gabimisht nga ushtarët izraelitë.

Sipas ushtrisë, më vonë është kuptuar që ata kanë dhënë shenja se nuk janë të rrezikshëm.

Kjo është hera e parë që Izraeli e ka pranuar të ketë dëmtuar pengjet në luftën, të cilën thotë se e zhvillon edhe për t’i shpëtuar të gjalla të gjithë pengjet e marra prej Hamasit.

Tri pengjet, tre burra në të 20-at, janë vrarë të premten në qytetin e Gazës, ku kanë qenë duke u zhvilluar luftime të ashpra mes ushtrisë izraelite dhe militantëve të Hamasit.

Ushtria ka thënë se është duke e hetuar rastin në nivelin më të lartë.

LEXONI GJITHASHTU:

• Ushtria izraelite thotë se vrau gabimisht tri pengje izraelite në Gazë
• Forcat izraelite vrasin gabimisht tre pengje vendase: Na u dukën si kërcënim