Izraeli vret liderin e dytë islamik palestinez gjatë bombardimeve në Gaza

Izraeli ka vrarë një tjetër drejtues të grupit Xhihadi Islamik Palestinez, teksa numri i viktimave si pasojë e bombardimeve në Gaza arriti të dielën në 29 persona.

Bëhet fjalë për Khaled Mansour, një lider ushtarak, i cili mbeti i vrarë në lokalitetin e Rafahut, në jug të Gazës.

Autoritetet lokale në territorin e qeverisur nga lëvizja islamike e Hamasit deklaruan se të paktën 6 fëmijë ishin mes personave të vrarë që nga nisja e të ashtuquajturit “agresioni izraelit” ditën e premte, që ka lënë gjithashtu mbi 200 persona të plagosur.

Por Izraeli reagoi duke thënë se kishte prova të pakontestueshme se një sulm i gabuar me raketa nga militantët e Xhihadist Islamik kishte qenë përgjegjës për vdekjen e fëmijëve në Xhabalia, në veri të Gazës, ditën e shtunë.

Zëdhënësi i qeverisë së shtetit hebre tha se raketat e qëlluara nga rebelët në Gaza drejt Izraelit kishin dështuar të arrinin objektivin.

Ende nuk është e qartë se sa fëmijë mbetën të vrarë në Xhabalia, por një fotograf i agjencisë së lajmeve “AFP” deklaroi se kishte parë 6 trupa të pajetë në një spital, përfshirë 3 të mitur.

Ndërkohë, gjatë natës mes së shtunës dhe së dielës, kryeministri izraelit Yair Lapid mbajti një mbledhje të kabinetit të tij.

Ushtria izraelite paralajmëroi se operacionet ajrore kundër militantëve në Gaza mund të zgjasin një javë, pasi shkëmbimi i zjarrit po vazhdon, në atë që konsiderohet si përshkallëzimi më i rëndë që prej vitit të kaluar.

LEXONI GJITHASHTU

• Izraeli arreston 19 militantë të dyshuar për sulmet në Gaza
• VIDEO | Luftë me raketa mes Palestinës dhe Izraelit