Izraeli zotohet për shkatërrimin e qytetit të Gazës nëse Hamasi nuk pranon kushtet

Ministri izraelit i Mbrojtjes, Israel Katz, u zotua se qyteti i Gazës do të shkatërrohet nëse Hamasi, nuk pajtohet të çarmatoset, të lirojë pengjet e mbetura dhe të japë fund luftës sipas kushteve të Izraelit.

“Së shpejti, dyert e ferrit do të hapen për kokat e vrasësve dhe përdhunuesve të Hamasit në Gazë, derisa ata të pajtohen me kushtet e Izraelit për t’i dhënë fund luftës, për lirimin e të gjitha pengjeve dhe çarmatosjen e tyre”, shkroi Katz në rrjetet sociale.

Ai paralajmëroi se nëse kushtet nuk respektohen, Gaza, kryeqyteti i Hamasit, mund të përjetojë fatin e qyteteve Rafah dhe Beit Hanun, të cilat janë shkatërruar në masë gjatë operacioneve paraprake izraelite.

Deklaratat e Katzit vijnë pas urdhrit të kryeministrit izraelit Benjamin Netanyahu për negociata të menjëhershme për lirimin e pengjeve të mbetura, që do të kryhen paralelisht me operacionin për marrjen e kontrollit të Qytetit të Gazës. Për këtë qëllim, Ministria e Mbrojtjes autorizoi thirrjen e pothuajse 60.000 rezervistëve.

Ndërkohë, ndërmjetësit po presin përgjigje zyrtare nga Izraeli mbi një propozim të armëpushimit që Hamasi e ka pranuar, por për të cilin ende nuk ka një konfirmim të detajuar.

Planet e zgjerimit të ofensivës izraelite kanë nxitur shqetësime ndërkombëtare dhe debate brenda Izraelit. Lufta në Gazë nisi më 7 tetor 2023 pas sulmeve të Hamasit në jug të Izraelit, ku u vranë afërsisht 1.200 persona dhe u rrëmbyen 251 të tjerë. Për pasojë, ofensiva izraelite ka shkaktuar më shumë se 62.000 viktima palestineze, sipas Ministrisë së Shëndetësisë në Gazë.

LEXONI GJITHASHTU:

• Izraeli miraton planin për pushtimin e qytetit të Gazës, paralajmëron Hamasin
• Irani mban stërvitjet e para ushtarake pas luftës me Izraelin