Japonia furnizon BE-në me gaz pas shqetësimit nga reagimi rus

Japonia ka vendosur të dërgojë ngarkesa me gaz të lëngshëm në Evropë si përgjigje ndaj kërkesave të Shteteve të Bashkuara dhe BE-së, të cilat i druhen reagimit të Rusisë që ka mbledhur trupa pranë kufirit me Ukrainën.

Sipas ministrit japonez të Tregtisë, ngarkesat e para pritet të mbërrijnë muajin e ardhshëm.

“Japonia ka siguruar mjaftueshëm gaz për t’iu përgjigjur nevojave të brendshme. Dhe ndërsa situata ndërkombëtare tensionohet për shkak të Ukrainës, ne duhet të vendosemi në të njëjtën linjë me vendet e G7-s; sidomos me ato që ndajnë të njëjtat vlera si Japonia”, tha Koichi Hagiuda, ministër i Tregtisë në Japoni.

SHBA dhe aleatët evropianë kanë paralajmëruar sanksione ekonomike dhe politike nëse Rusia pushton Ukrainën, por nga ana tjetër shqetësohen nga mundësia që Rusia të ndërpresë furnizimet me gaz ndaj Evropës në mes të dimrit.

Të paktën 40 për qind të gazit natyral që BE importon dhe thuajse një e treta e naftës vijnë nga Rusia.

“Sot, ambienti ynë karakterizohet nga turbolencë gjeopolitike në kontekstin e krizës së Rusisë dhe Ukrainës dhe çështjeve të energjisë që janë thelbi i kësaj krize, pasi Moska nuk heziton t’i përdorë furnizimet me energji si mjet për përfitime gjeopolitike”, u shpreh Josep Borrell, Përfaqësues i Lartë i BE-së për Punët e Jashtme.

Presidenti amerikan Joe Biden u zotua të hënën, gjatë takimit me kancelarin gjerman Olaf Scholz se do të mbyllë gazsjellësin “Rrjedha e Veriut 2”, që nga Rusia shkon në Gjermani, nëse Moska ndërmerr një operacion ushtarak ndaj Ukrainës.

Nga ana e tij, Scholz nuk u tregua shumë i qartë, duke thënë vetëm se ishte i bashkuar me Biden.

LEXONI GJITHASHTU:

• 150 mijë studentë të harruar, Japonia nuk hap kufijtë
• Luftanijet ruse e kineze patrullime në Oqeanin Paqësor, vëzhgohen nga Japonia