“Jemi drejt falimentimit”, kreu i PD takime me bizneset në Tiranë

Kryetari i Partisë Demokratikem, Lulzim Basha është takuar sot me biznese të vogla në njësinë 3 në kryeqytet. Në videon e shpërndara për mediat nga Paria Demokratike,  tregtarët shprehen se pagesa shumë e vogël e dhënë nga qeveria, është e pamjaftueshme për të përballuar shpenzimet qerasë dhe faturat mujore apo taksat.

Ata janë kundër mbylljes së bizneseve në fundjavë, pasi sipas tyre, blerësit janë më të shumtë gjatë ditëve të pushimit, pasi gjatë javës janë në punë. Z. Basha u shpreh se kjo situatë vjen si pasojë e keq menaxhimit të ekonomisë gjatë periudhës së pandemisë. Sipas tij, nëse do të ishin dëgjuar propozimet e opozitës, sot nuk do të kishte një rënie konsumi kaq të lartë.

Bizneset ankohen për rënien e xhiros ditore por edhe për pengesat që sjell bllokimi gjatë fundjavës, kohë kur sipas tyre ka më shumë shitje.

“Me xhiron që kemi nuk justifikon kredinë, qiranë dhe taksat. Është krizë e thellë dhe nuk e di se çfarë mund të bëhet. Nuk ka pse të mbyllen të shtunën dhe të dielën sepse njerëzit atëherë dalin. Jam drejt falimentimit”, shprehet një shitëse dyqani.

Disa prej bizneseve thonë se nuk kanë marrë asnjë lloj ndihme nga qeveria, pavarësisht se janë prekur nga masat shtrënguese.

“Edhe pse na mbajnë dy muaj të mbyllur për shkak të pandemisë, sigurimet shoqërore dhe taksat e bashkisë na i kanë marrë një më një”, ankohet një pronar biznesi.

“Ky e ka mendjen vetëm me zhvat dhe marrë, por situatën do ta ndryshojmë”, u shpreh z. Basha gjatë takimit me një shitëse kioske.

“Mezi mbijetojmë, jemi vetë i pesti në shtëpi. Me këtë dyqan mbahemi”, tha një çift tregtarësh.