Ministri i Jashtëm i Turqisë, Hakan Fidan, ka theksuar nevojën urgjente për t’i dhënë fund luftës midis Rusisë dhe Ukrainës, duke propozuar arritjen e një paqeje të përhershme brenda këtij viti. Nga kryeqyteti ukrainas, Kiev, ku u takua me ministrin e Jashtëm të Ukrainës, Andrii Sybiha, Fidan tha se “jemi në një udhëkryq kritik: ose do të mbyllim sytë ndaj vazhdimit të luftës, ose do të arrijmë një paqe të qëndrueshme”.

Ai nënvizoi rëndësinë e negociatave të mbajtura në Stamboll më 16 maj, duke i quajtur ato një fillim të ri. Sipas tij, marrëveshja e arritur për shkëmbimin e të burgosurve është dëshmi se dialogu mund të sjellë rezultate konkrete. “Duam që vrulli i krijuar në Stamboll të vazhdojë,” tha ministri turk.

Në këtë kontekst, Fidan propozoi organizimin e një samiti të nivelit të lartë me pjesëmarrjen e katër udhëheqësve: presidentit turk Recep Tayyip Erdoğan, presidentit amerikan Donald Trump, presidentit rus Vladimir Putin dhe presidentit ukrainas Volodymyr Zelenskyy. Sipas tij, një takim i tillë mund të çojë drejt një armëpushimi afatgjatë dhe hapjes së rrugës për një zgjidhje përfundimtare.

Fidan gjithashtu paralajmëroi për ndikimin që po ka lufta në arkitekturën e sigurisë evropiane dhe në marrëdhëniet ndërmjet Evropës dhe SHBA-së, veçanërisht pas ardhjes në pushtet të presidentit Trump. Ai përsëriti qëndrimin e Turqisë se kostoja më e madhe e konfliktit po bie mbi Ukrainën. “Qytetet e shkatërruara janë ukrainase, jetët e humbura janë të ushtarëve ukrainas. Kjo luftë duhet të ndalet sa më shpejt”, përfundoi Fidan.

LEXONI GJITHASHTU:

• “Putin është çmendur”- Kritikat e forta të Trump, nuk “kursehet” as Zelensky
• “Putin është çmendur, s’e di ç’i ndodhi”- Kremlini i përgjigjet deklaratave të Trump