Ish-kryebashkiaku i Himarës Jorgo Goro ka shfaqur probleme shëndetësore në ambientet e burgut.

Burime për Euronews Albania bëjnë me dije se Goro është shtruar në spitalin e burgut këtë të mërkurë, një ditë pasi GJKKO rikonfirmoi masën e “Arrestit me burg”.

Sipas burimeve Goro ka shfaqur probleme kardiake në orët e para të mëngjesit.

Kujtojmë se më herët këtë të enjte u bë publike dhe dorëheqja e Goros nga posti i kryetarit në detyrë i Bashkisë së Himarës.

Goro e dha dorëheqjen përmes një letre që mban datën 25 mars, në të cilën i drejtohej Këshillit Bashkiak dhe qytetarëve të Himarës.

Mes të tjerash Goro shkruante se është në një situatë absurde me drejtësinë për një faj që sipas tij nuk e ka bërë.

Goro u arrestua të shtunën e 23 marsit 2024 me kërkesë të Prokurorisë së Posaçme pasi po hetohet me dyshime se ka shpërdoruar detyrën në dy raste, duke tjetërsuar dy prona në Dhërmi, me një sipërfaqe në total prej 10592 m2, ku  përfitues fundor i truallit ka qenë biznesmeni Artan Gaçi për ndërtimin e kompleksit turistik.

LEXONI GJITHASHTU:

• Beleri dhe Goro në burg, kush janë 2 emrat që mund të marrin drejtimin e Himarës
• Lihet në burg Jorgo Goro, ndryshon masa e sigurisë për ish-kreun e ASHK Vlorë