Jorgo Papingji në ”Urban Story”: Tekstin e parë e kam shkruar për Festivalin e Këngës së Fëmijëve

Me tekstet e tij janë rritur breza e breza të tërë shqiptarësh. Shumë prej nesh dimë përmendësh çdo rresht që ka shkruar pena e tij e artë. Janë fjalë të thjeshta, kuptimplotë, që godasin në zemër. Jorgo Papingji autori brilant i teksteve të këngëve vjen në një rrëfim të rrallë për Urban Story.

Duke u kthyer pas në kujtime Jorgo Papingji na rrëfen se pasioni për të shkruar poezi i ka nisur herët, me blloqet e kujtimeve të tij.

“Unë kujtoj se ka qenë brenda meje, ka qenë e mbyllur dhe u krijua një mundësi që u hap dhe nuk u mbyll më kurrë. Pastaj filluan disa fletore shënimesh, kujtimesh dhe mbaj mend, që isha i vetmi që shkruaja kujtimet në poezi”, rrëfen Papingji.

Tekstin e parë e ka shkruar për festivalin e këngës për fëmijë. Reagimi i publikut ishte shumë pozitiv, ndaj ky ka qenë dhe momenti kur Papingji nisa ta mendonte seriozisht pjesëmarrjen në festivalin e këngës.

“Një ditë të bukur m’u mbush mendja të shkruaja një këngë për Festivalin e Këngës në RTSH dhe ishte pjesëmarrja e parë e imja në festivalin e madh në radiotelevizion”, tregon Jorgo Papingji.

Ishte pikërisht ky moment, që vulosi dhe pjesëmarrjen në Festivalin e Këngës në RTSH për katër dekada me radhë, pa shkëputje.