Jorida Tabaku: Pandemia tregoi Shqipërinë reale, qeveria dështoi me biznesin

Ish-deputetja e Partisë Demokratike, Jorida Tabaku tha në “Ilva Now” se pandemia e COVID-19, nxori zbuluar Shqipërinë reale, e cila sipas saj po përballet me pasoja të mëdha nga keqmenaxhimi. Ajo tha se pandemia faktoi katërcipërisht se buxheti i shtetit nuk kishte fuqi reale të shpërndante apo të alokonte fonde në ndihmë të biznesit.

“Është një situatë që preku të gjithë vendet e rajonit dhe të botës. Askush nuk ishte imun ndaj efekteve që pati. Pandemia tregoi diçka shumë të rëndësishme për ekonomë shqiptare, që ekonomia dhe buxheti ishin në pikën e tyre më kritike. Këtë e evidentoi pandemia se buxheti ishte i paaftë që të alokonte fonde. Qeveria shte e paaftë për t’i qëndruar afër bizneseve me politikat fiskale, sepse e kanë lodhur aq shumë dhe e kanë vjedhur aq shumë  buxhetin. Tregoi se kush është Shqipëria reale, që është totalisht larg atyre shifrave dhe gënjeshtrave që ato japin’, tha ajo.

Duke thënë se qeveria e drejtuar nga Rama ka alokuar më pak para se të gjitha vendet e rajonit për kalimin e pandemisë globale, znj. Tabaku shtoi faktin se mazhoranca tani po përpiqet të manipulojë shifrat e punësimit.

“Alokuan 0.86 % të PBB më pak se në të gjithë rajonin. Dy herë më pak se Kosova dhe tre herë më pak se Maqedonia e Veriut. Qeveria thotë se konsumi ka rënë, kanë rënë të ardhurat. Kur ka rënie ekonomike nuk rritet punësimi. Shifrat janë të manipuluara dhe unë besoj se  këto manipulimet po dëmtojnë sistemin e ekonomisë”, shtoi ajo.