Jozefina Topalli: Basha ka punuar për përjashtimin e Berishës

Ish-nënkryetarja e Partisë Demokratike, Jozefina Topalli shprehet se Lulzim Basha ka punuar për përjashtimin e Sali Berishës.

“Nuk është i vështirë, është vendimi që e dëshironte më shumë se asgjë tjetër dhe prej kohësh punonte për atë”, tha Topalli në studion e “Now” me Erla Mëhillin.

Sipas znj. Topalli vendimi i Bashës është “irracionale për nga pikëpamja politike” dhe e krahason me vendimet që merr lideri i Koresë së Veriut.

Ajo thotë se nisur nga rrjedhja e gjerave, Basha ka dhënë dakordësinë për të gjitha zhvillimet që çuan në përjashtimin e Berishës.

E pyetur se si do të vepronte ajo po të ishte kryetare e PD, znj. Topalli u përgjigj duke thënë se do të kishte dhënë dorëheqjen.

“Kurrë nuk do të kisha marrë një vendim të paligjshëm. Isha tërheq, kisha shkuar në shtëpinë time”, deklaroi ish-deputetja e PD.

Znj. Topalli kujtoi se Basha ka dalë kundër SHBA në prag të zgjedhjeve të 2017 ku vetë zv.ndihmës sekretari amerikan i kërkoi që të hynte në zgjedhje. Gjithashtu kujtoi se ka dalë kundër DASH për djegien e mandateve. Nisur nga  kjo, ajo tha se SHBA mund ta kenë futur vetë Bashën në listën e personave “non grata”.

“DASH pas djegies së mandateve i ka thënë që mund të humbësh mundësinë për të hyrë në SHBA dhe fakt është se ka vite që nuk shkon në SHBA. Thotë që e ke të vështirë të kundërshtojë SHBA ndërkohë që ka bërë të kundërtën në 2017 dhe në djegien e mandateve”, deklaroi znj. Topalli.