Kafja e pandashme në përditshmërinë e qytetarëve dhe pse çmimi është rritur

Çmimi i kafes po rritet çdo herë e më shumë, por kjo gjë nuk i pengon qytetarët në vendin tonë që të mos e konsumojnë atë. Të dhënat e INSTAT tregojnë se gjatë tetorit, rritja ka qenë 7.1% për “kafe, çaj dhe erëza”, krahasuar me një vit më parë.

Por surprizuese mbeten shifrat e importit dhe konsumimit. Në 10 muajt e parë të vitit, janë konsumuar 6.7 mijë tonë kafe, një rritje prej 3.5% krahasuar me të njëjtën periudhë të vitit të kaluar. Kjo shifër është ndër më të lartat e regjistruara që nga viti 2018.

Sociologia, Entela Binjaku u shpreh se pirja e kafes është bërë një ritual i përditshëm teksa ndajnë shqetësimet e tyre ose për të zgjidhur situata të ndryshme.

“Kafeja është bërë pjesë thelbësore e bareve dhe restoranteve, që janë bizneset më të zakonshme në të gjithë Shqipërinë. Shqiptarët e gjejnë tek këto bare dhe restorante një pikë takimi, ku mund të bisedojnë ose të kalojnë kohë me të tjerët, me më shumë ose më pak kuptim.

Pirja e kafesë është bërë një ritual i përditshëm që rrjedh nga vitet e mëparshme, dhe shumë njerëz e kanë të vështirë ta ndryshojnë këtë rutinë. Rreth një filxhani kafe, njerëzit ndajnë hallin dhe shqetësimet e tyre, përjetojnë momente të përbashkëta dhe shpesh mund të kryejnë edhe marrëveshje për të zgjidhur situata të ndryshme”, u shpreh ajo.

Në Shqipëri, kafenetë nuk janë thjesht vende për të pirë kafe, ato janë pika takimi dhe reflektimi për të rinjtë dhe profesionistët, pjesë e rëndësishme e stilit të jetesës. Konsumimi i kafes nuk është vetëm një zakon i përditshëm, por një simbol i mikpritjes dhe i jetës sociale, një traditë e ruajtur ndër breza që e ka çuar konsumin në nivele historike.

LEXONI GJITHASHTU:

• Macron, thirrje evropianëve të kenë një vend në tryezën e negociatave për Ukrainën
• U dënua për shkak të detyrës, gazetarja Nika Novak zhduket nga burgu në Siberi