Kallas: Kritikat e SHBA-së ndaj politikave të Evropës nuk janë të vërteta

Bashkimi Evropian duhet të mbetet i sigurt përballë kritikave nga dokumenti i strategjisë së Shtëpisë së Bardhë që kritikojnë politikat e BE-së, tha të martën shefja e politikës së jashtme të bllokut, Kaja Kallas, duke thënë se pretendimet “nuk janë të vërteta”.

“Sa i përket sulmeve të SHBA-së ndaj mënyrës së funksionimit evropian dhe strategjisë, mendoj se duhet të jemi më të vetëbesuar, sepse të gjitha këto gjëra që lexoni për Evropën, nuk janë të vërteta,” tha Kallas gjatë një takimi me Komitetin e Punëve të Jashtme të Parlamentit Evropian, AFET.

“Më duket sikur është bërë si provokim që ne të reagojmë. Kishte gjithashtu një artikull në Financial Times që tregonte se çështjet që ata përmendin në strategjinë e sigurisë kombëtare nuk janë më të këqija në Evropë sesa në Amerikë,” shtoi ajo.

Ajo theksoi se, ndonëse kritika të tilla mund të nxisin përçarje si mes BE-së dhe SHBA-së, ashtu edhe mes vendeve evropiane, fokusi duhet të mbetet tek prioritetet strategjike të Evropës.

“Në politikë, nëse hyn në debate mbi gjëra që ti e di se nuk janë të vërteta, atëherë në fakt i pranon ato. Dua të them, ne e dimë që kjo është qesharake. Bashkimi Evropian është thelbi i lirisë. Prandaj, çdo kritikë e tillë për liritë duhet të drejtohet diku tjetër. Ndoshta te Rusia, ku mospajtimi ndalohet, ku media e lirë ndalohet, ku opozita politike ndalohet, ku X apo Twitter, siç e njohim, është në fakt i ndaluar,” tha ajo.

Ajo paralajmëroi se ishte kundër përfshirjes në një “lojë akuzash” me SHBA-të.

“Edhe ne mund të tregojmë me gisht shumë gjëra që nuk shkojnë në Amerikë. Por ky nuk është mënyra jonë e veprimit. Ne nuk do të ndërhyjmë në punët e brendshme të vendeve të tjera”.

Kallas theksoi se Evropa po përqendrohet tek forcimi i mbrojtjes së saj dhe ulja e varësive.

LEXONI GJITHASHTU:

• Trump bën deklaratën e fortë: Ukraina nuk do të pranohet kurrë në NATO
• Papa Leo takim me Zelensky, thirrje për vazhdimin e përpjekjeve për paqe