Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaia Kallas, deklaroi se uniteti transatlantik dhe mbështetja për Ukrainën janë thelbësore për t’i dhënë fund luftës dhe për të ndalur agresionin rus në Evropë.
“Uniteti transatlantik, mbështetja për Ukrainën dhe presioni ndaj Rusisë janë mënyra se si do ta përfundojmë këtë luftë dhe do të parandalojmë agresionin e ardhshëm rus në Evropë”, u shpreh Kallas menjëherë pas një takimi të jashtëzakonshëm të Këshillit të Punëve të Jashtme, i zhvilluar përmes videokonference.
Në një postim në platformën “X”, ajo bëri të ditur se ministrat e Jashtëm të BE-së shprehën mbështetjen e tyre për hapat e ndërmarra nga SHBA drejt një paqeje të drejtë.
“Ndërkohë, ne po punojmë për më shumë sanksione kundër Rusisë, më shumë mbështetje ushtarake për Ukrainën dhe më shumë ndihmë për nevojat buxhetore të Ukrainës dhe procesin e pranimit në BE”, shtoi Kallas.
