Kambanat e Notre Dame ranë 88 herë në kujtim të Papa Françeskut

Këmbanat e Katedrales së Parisit të Notre Dame ranë 88 herë sot në kujtim të Papa Françeskut, i cili vdiq mëngjesin e sotëm në moshën 88-vjeçare.

Një meshë do të mbahet në Notre Dame dhe autoritetet e qytetit do të fikin dritat në Kullën Eifel në mbrëmje në kujtim të Papës, raporton Reuters. Më herët gjatë ditës së sotme, Vatikani përmes një video-njoftimi njoftoi se Papa Françesku ndërroi jetë në moshën 88-vjeçare.

Ai ishte kreu i parë suprem nga Amerika Latine i Kishës Katolike Romake. Papa vuajti nga sëmundje të ndryshme gjatë 12 viteve që kaloi në krye të Kishës Katolike Romake.

Në shkurt ai u shtrua në spital me një infeksion të rëndë respirator, ku fillimisht u trajtua për bronkit dhe më pas u diagnostikua me pneumoni dyfishe.

Për shkak të rekomandimeve të mjekëve, ai nuk drejtoi shërbesën e djeshme të Pashkëve, por doli në fund për të dhënë bekimin tradicional.