Kanadaja “në mëshirë” të zjarreve/ Flakët i afrohen qytetit, evakuohen banorët

Afrimi i zjarreve masive, të cilat kanë arritur 17 km larg qytetit Jellou Najf, ka detyruar qeverinë kanadeze të urdhërojë evakuimin e banorëve.

Sipas njoftimeve të autoriteteve lokale, janë rreth 20 mijë personat të cilëve u është bërë apel të lënë banesat e tyre sa më shpejt të jetë e mundur.

Forcat e armatosura kanadeze po ndihmojnë zjarrfikësit në largimin e banorëve përmes avionëve të llojit “Hercules”.

Mbi 200 zjarre kanë shkrumbuar një sipërfaqe të madhe toke në rajonin e njohur si Territoret Veri-perëndimore.

Autoritetet paralajmërojnë se nëse nuk ka reshje, flakët do të arrijnë Jellou Najf, kryeqyteti i rajonit, gjatë fundjavës.

15 për qind e popullsisë së Territoreve Veri-perëndimore është evakuuar. Zyrtarët thonë se shumica e akseve rrugore janë të sigurta, por shtojnë se nëse tymi i zi kufizon shikueshmërinë, njerëzit që largohen nga Jellou Najf nga autostrada do të shoqërohen përmes zonës aktive të zjarrit.

LEXONI GJITHASHTU:

• Bllokohet aksi Bradashesh-Elbasan nga trafiku/ Qytetarët: Kemi 3 orë pa lëvizur
• Meloni nën presion/ Opozita: Dështoi në menaxhimin e krizës migratore