Kanadaja planifikon lehtësim të masave anti-COVID për udhëtarët

Kanadaja po planifikon të lehtësojë kufizimet për udhëtarët nga 28 shkurti. Ministri i Shëndetësisë Jean-Yves Duclos njoftoi se do hiqet kërkesa për testin PCR për udhëtarët e huaj plotësisht të vaksinuar.

“Sot po njoftoj se po lehtësojmë masat tona kufitare”, tha ministri i Shëndetësisë në një konferencë për shtyp.

“Këto ndryshime janë të mundshme jo vetëm sepse kemi kaluar kulmin e Omicron, por sepse kanadezët në të gjithë vendin po dëgjojnë shkencën dhe ekspertët, duke ndjekur masat e shëndetit publik dhe duke ndërmarrë hapa për të mbrojtur veten, familjet dhe komunitetet e tyre”, shtoi ai.

Aktualisht, udhëtarët duhet të tregojnë prova të një testi PCR negativ të kryer brenda 72 orëve nga nisja e fluturimit të tyre ose mbërritja e planifikuar në kufirin tokësor.

Udhëtarët e pavaksinuar do të testohen kur të mbërrijnë në Kanada.

Ndërsa, udhëtarët e vaksinuar plotësisht gjithashtu mund të testohen rastësisht kur të mbërrijnë, por nga 28 shkurti ata nuk do të duhet të karantinohen ndërsa presin rezultatet e testit.