Kanosën administratorin e një kompanie të tërhiqej nga tenderi, arrestohen 3 persona

Policia e Elbasanit dhe Forca e Posaçme Operacionale në Policinë e Shtetit, në bashkëpunim me prokurorinë pranë gjykatës së rrethit, kanë zhvilluar mbrëmjen e djeshme dhe mëngjesin e sotëm një operacion ndaj një grupi që kanosi administratorin e një kompanie private që të tërhiqej nga një tender që kishte fituar kompania e tij.

Në kuadër të operacionit policor të koduar “Tenderi”, u vunë në pranga shtetasit: Algert Alcani, 27 vjeç, Edmir Boci, 37 vjeç, Shaqir Alcani, 62 vjeç, si dhe u shpall në kërkim 38 vjeçari, për veprën penale “Shtrëngimi me anë të kanosjes ose dhunës për dhënien e pasurisë”, e kryer në bashkëpunim.

Administratori në Erald Miftari, nuk ka pranuar të tërhiqet dhe këta shtetas e kanë kërcënuar se do të vrisnin atë dhe familjarët e tij.

Policia sekuestroi në cilësinë e provës materiale automjetin e përdorur nga autorët dhe 8 aparate celulare.

Materiale procedurale në ngarkim të tyre i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.

“Në kuadër të këtij operacioni u kapën dhe u ndaluan shtetasit:

E. B., 37 vjeç, A. A. 27 vjeç dhe Sh. A., 62 vjeç, tre banues në Tiranë, si dhe u shpall në kërkim shtetasi L. K., 38 vjeç, për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.

Këta shtetas, në bashkëpunim me njëri-tjetrin, kanë shtrënguar me anë të kanosjes, shtetasin E. M., administrator i një biznesi me qendër në Cerrik, Elbasan, duke i kërkuar që të tërhiqej nga një procedurë konkurrimi (tender publik), e fituar në bashkinë e Tiranës, nga firma e që ai adminsitronte”, njofton policia.

LEXONI GJITHASHTU:

• U rrahën për një gërvishje makine, e ‘pësojnë’ 4 personat e sherrit te Zogu i Zi
• Aksident në Fushë Krujë, 1 i plagosur