Kaos në Kuvend/ Balla kërkon ndërprerjen e seancës, Noka ia fryn bilbilin në vesh

Kryetari i Grupit Parlamentar të Partisë Socialiste, Taulant Balla, kërkoi ndërprerjen e seancës plenare të kësaj të hëne.

Shkak për këtë vendim sipas socialistit, është marrja e masave ndaj të gjithë atyre që kanë penguar punën e Kuvendit, por dhe për gjuhën seksiste të përdorur nga ish-kryeministri Berisha.

Ajo që ra në sy gjatë fjalës që Balla po mbante në Kuvend, ishte se deputeti i PD-së Flamur Noka, i frynte pa pushim bilbilit në një distancë shumë të afërt me të.

“Kuvendi do ta vijojë detyrën e tij dhe do të marrë masa më të ashpra ndëshkimore jo vetëm për bllokimin e parlamentit, por edhe për gjuhën seksiste të përdorur këtu.

Diskriminimi me bazë gjinore nuk mund të tolerohet. Keqardhja ime më e madhe është për shoqërinë civile që nuk reagoi ndaj deklaratave të Berishës të premten.

Një burrë në moshën e tij, krijon insinuata dhe thotë që kam video. Nxirri po je burrë!

I propozoj Kuvendit ndërprejen e seancës për marrjen e masave. Ne do ta rikthejmë parlamentarizmin, pasi hallin e Berishës nuk mund ta shpëtoj bilbili”, tha Balla.