Kejdi Mehmetaj sqaron incidentin për banderolat me punonjësit e bashkisë në Fier

Kandidatja për deputete e Lëvizjes Socialiste për Integrim Kejdi Mehmetaj sqaroi për Euronews Albania incidentin që u shënua sot në mjediset e Bashkisë Fier.

Mehmetaj shpjegoj se zanafilla ishte te disa banderola të vendosura në godinën private të mare me qira nga LSI në qytetin e Fierit. Ajo tha se sipas Kodit Zgjedhor LSI-së i lejohet që të shfaqë në këtë godinë materiale reklamuese për fushatën zgjedhore, mirëpo “dikush ka vajtur për t’i hequr në mënyrë të dhunshme dhe të paligjshme”.

“[…] muk ishte kërkuar prezenca e përfaqësuesve të LSI-së, por me shkallë ishin ngjitur si hajdutë kishin prishur banerat, na kontaktuan, kërkuam informacion, askush nuk na përgjigjej përveçse [thoshin se ishin] punonjës të bashkisë, më tej drejtori i policisë bashkiake na ftoi të flisnim në godinën e bashkisë dhe kur vajtëm atje punonjës të policisë nuk na lejonin të futeshim brenda duke ngritur edhe dorë ndaj kandidatëve për deputetë,” – u shpreh Mehmetaj.

“Pritëm për rreth 40 minuta që kryetari i Bashkisë Fier të dilte dhe të jepte një përgjigje publike për aktin që bëri,” – vijoi kandidatja e LSI-së.

Mehmetaj tha se aktualisht banerat janë gjysmë të shqyera. Duke i konsideruar provokime, ajo shtoi se do t’i rivendosin sërish pas takimit që do të organizojë Partia Socialiste në Fier.

Kandidatja e LSI-së tha se kryetari i Bashkisë Fier nuk pranoi të jepte komente për këtë ngjarje.

“Punonjësit e policisë bashkiake ishin të paidentifikueshëm, ndërsa nga zyra e kryetarit doli një person që më kanë thënë që nuk është punonjës por sekretar i PS, pra si të ishte një zyrë partie dhe jo bashkie,” – shtoi Mehmetaj.

LEXONI GJITHASHTU:

• Incidenti me banderolat në Fier, Meta këshillon LSI-në të tolerojë situatën
• Përplasje fizike mes anëtarëve të LSI-së dhe policisë Bashkiake në Fier