“Kënga e Zogut të Parajsës”/ Profesori i fizikës në Pogradec publikon librin e tij

“Kënga e Zogut të Parajsës”, ky është libri i fundit i poetit dhe prozatorit të njohur pogradecar Istref Haxhillari.

Edhe pse mësues fizike, Istrefi ka mundur të kultivojë brenda vetes edhe botën artistike.

Në librin e fundit Haxhillari ka ardhur para lexuesve me një poemë për dashurinë duke guxuar për t’u paraqitur krejt ndryshe nga herët e tjera për besnikët e krijimtarisë së tij.

“Kënga e Zogut të Parajsës” është një poemë e shkruajtur në gjuhën e prozës, një poemë për dashurinë, për jetën, për guximin, ndoshta edhe për moralin. Unë e përfytyroj botën pak ndryshe nga realiteti, në këtë libër ka një realitet që ndryshon nga ai që jetojmë zakonisht, është një realitet ku disa gjëra e ngatërrojnë, janë eliminuar ose minimizuar siç është paragjykimi, mosmirënjohja etj”- tha Istref Haxhillari.

Vepra e tij e fundit sipas Haxhillarit e ka zanafillën në një ngjarje të dhimbshme të jetuar që ka të bëjë me dy të rinj, ku një djalë vret të dashurën dhe më pas e veten.

“Si indicie e librit është një ngjarje e shumë viteve më parë, një nga ngjarjet më të rënda që kam parë në jetën time. Një çift të dashuruarish ku djali e vret vajzën dhe më pas godet veten. Unë kam qenë drejtor shkolle asokohe dhe momenti që kam fiksuar atëherë është se ajo kishte vdekur ndërsa ai ishte në grahmat e fundit dhe kërkonte të dinte me sy nëse ajo kish vdekur apo jo. Ne nuk e kuptuam këtë, por një grua e kuptoi, ai vdiq me një buzëqeshje lumturie që unë nuk e heq dot nga mendja.

Ai donte që në atë botë të ishte sërish me të. Kjo është forca e dashurisë që mua më ka motivuar gjithmonë ti kthehem pas asaj ngjarje e cila ka qenë indicie për çdo vepër që kam shkruar, frymëzim që më ka ngacmuar të shkruaj për dashurinë”- theksoi Haxhillari.

Istref Haxhillari është autor i 6 romaneve, 5 vëllime me tregime, 1 novelë dhe një tjetër libër për fëmijë.

LEXONI GJITHASHTU: 

• Rrëzimi i mocionit me debat për drogën, reagon Bardhi
• Ministria e Energjisë: Kompania Shell nuk është tërhequr nga kërkimet në Shpirag