Kërcënoi Kosovën me vizat, Albin Kurti takohet me presidentin Macron në Paris

Kryeministri i Kosovës, Albin Kurti, ka zhvilluar një takim me presidentin e Francës, Emmanuel Macron, në Paris.

Takimi është zhvilluar në prag të Forumit të Paqes që pritet të organizohet në kryeqytetin francez, pjesë e të cilit do të jetë edhe kryeministri i Shqipërisë, Edi Rama.

Lajmin për takimin me Macron e ka bërë të ditur vetë Kurti përmes një postimi në Facebook, ku ka ndarë edhe foto nga takimi.

“Në Pallatin Élysée, bashkë me Ritën, mysafirë të Presidentit francez Macron dhe Zonjës së Parë të Francës, Brigitte Macron, në prag të edicionit të gjashtë të Forumit të Paqes në Paris”, ka shkruar Kurti.

Takimi i Kurtit me Macron vjen në një moment tensionesh mes Kosovës dhe Serbisë, kur ende nuk është gjetur një zgjidhje e pranuar nga të dyja palët, për t’i dhënë fund mosmarrëveshjeve mes dy vendeve.

Kujtojmë po ashtu se Macron tha gjatë konferencës së përbashkët me kryeministrin Rama rreth një muaj më parë në Shqipëri, se janë pezulluar përkohësisht vizat për Kosovën.

Ai shtoi se ky vendim është marrë pasi nuk është mbajtur fjala e dhënë për dialogun Kosovë-Serbi, ndërsa shtoi se kryeministri Kurti dhe presidenti i Serbisë Vuçiç duhet të tregohen më të përgjegjshëm.

“Sikurse e dini, ne e ndjekim me shumë vigjilencë tensionet që ekzistojmë mes Prishtinës dhe Beogradit. Franca dhe Gjermania kanë bërë një propozim udhërrëfyes që unë mendoj se është i fortë dhe i mirë dhe presim që të respektohen nga të dyja palët.

Mendoj se është përgjegjësia e zotit Vuçiç që të dënojë prerazi aktet e 24 shtatorit sepse kontribuon në rikthimin e qetësisë në kufi dhe më pas etapat e ardhshme dhe ajo çka presim nga autoritetet kosovare dhe serbe është e thjeshtë; riorganizmi i zgjedhjeve në komunat ku këto u bënë në kushte të papërshtatshme, pjesëmarrjen e serbëve në këto zgjedhje dhe në institucione, njohjen e asociacionit të komunave serbe nga autoritetet kosovare.

Sipas kësaj radhe, plotësisht dhe totalisht dhe pres që presidenti Vuçiç të jetë përgjegjës, pres të njëjtën gjë nga presidentja dhe kryeministri kosovar. E them me shumë qartësi; ne u kemi besuar për çështjen e vizave, çështja është pezulluar nga ana e Francës sepse ka të bëjë me respektin e fjalës së dhënë dhe fjala nuk po mbahet. Pres që të angazhohen të dyja palët që të ecin përpara në javët e ardhshme. Është kushti i paqes në të gjithë zonën”, tha Macron.

LEXONI GJITHASHTU: 

• Deklarata e Macron në Tiranë, Behrami: BE po shantazhon Kosovën
• Macron kërcënon me vizat Kosovën: Fjala s’është mbajtur, pres përgjegjshmëri