KFOR-i konfirmon të shtënat në afërsi të patrullës së tij në Zubin Potok

Misioni i NATO-s në Kosovë, KFOR, ka thënë për mediat në Kosovë se “ka dëgjuar dhe ka parë” të shtëna në afërsi të një patrulle të tij në Zubin Potok, njëra nga katër komunat e banuar me shumicë serbe në veri të Kosovës.

Ngjarja ka ndodhur mbrëmjen e së dielës, ndërsa KFOR-i tha se nuk ka të lënduar e as dëme materiale, shkruan REL.

Më herët, Policia e Kosovës ka përgënjeshtruar raportimet e mediave serbe se ka qenë e përfshirë në shkëmbim zjarri në Zubin Potok.

“Nuk ka pasur ndonjë sulm ndaj Policisë së Kosovës, e as nuk ka pasur ndonjë shkëmbim zjarri mes Policisë së Kosovës, apo ndonjë grupi. PK-ja nuk ka pasur shkëmbim zjarri ndaj askujt”, thuhet në njoftimin për media.

Mediat serbe kanë raportuar të dielën mbrëma se rreth orës 19:45 janë dëgjuar shkëmbime zjarri në Zubin Potok, dhe se të shtënat kanë ndodhur pasi Policia e Kosovës “ka dashur të heqë njërën nga barrikadat” në këtë komunë në veri të Kosovës.

LEXONI GJITHASHTU:

• Lekaj: Kurti ka bërë hapa të gabuara në Veri, qytetarët atje në mëshirë të Zotit
• Diplomati gjerman reagon ndaj kryeministres serbe për Veriun