Kievi ashpërson masat anti-COVID, shkak infektimet

Kievi, kryeqyteti ukrainas ka ashpërsuar masat anti-COVID këtë të hënë në përpjekje për të frenuar një rritje të infeksioneve COVID-19 që po prek shumë vende në të gjithë Evropën Lindore.

Nga e hëna, banorët e Kievit do të duhet të paraqesin certifikata vaksinash ose prova të një testi negativ për COVID-19 për t’u futur restorante, kafene, palestra, ambiente argëtimi dhe qendra tregtare. Stafi që punon në ato vende duhet të jetë i vaksinuar.

Autoritetet vendore kanë thënë se ekipet speciale do të monitorojnë respektimin e kufizimeve në transportin publik.

Qeveria i ka bërë të detyrueshme vaksinimet kundër COVID-19 për disa punonjës të shtetit dhe autoritetet shpresojnë se kërkesat e reja do të përshpejtojnë vaksinimin.

Ukraina ka regjistruar 2.94 milionë infeksione dhe 68.027 vdekje deri më 1 nëntor. Vetëm 7.4 milionë njerëz, ose më pak se një e pesta e popullsisë totale prej rreth 41 milionë banorësh janë vaksinuar plotësisht deri më tani.

Rusia fqinje ka vendosur gjithashtu masa të reja bllokimi, pasi vdekjet nga COVID-19 arritën një nivel rekord të përditshëm.

Në Poloni, e cila kufizohet gjithashtu me Ukrainën, numri i përgjithshëm i rasteve kaloi tre milionë të premten.

LEXONI GJITHASHTU:

• Johnson dhe Macron takim mbi mosmarrëveshjet për peshkimin
• Cili është vendi që paguan më shumë taksa në BE?