Kievi zmbraps sulmet e reja ruse me dronë

Rusia e kreu një valë të re sulmesh me dronë mbi Kievin, njoftuan zyrtarët rajonalë më 25 korrik, ndërsa Moska tha se e zmbrapsi një sulm ukrainas ndaj anijeve të saj patrulluese në Detin e Zi, mes raportimeve se Shtetet e Bashkuara do të njoftojnë për një pako të re ndihma ushtarake për Ukrainën, në vlerë 400 milionë dollarë.

Të gjithë dronët nga forcat ruse gjatë natës në sulmin e gjashtë ndaj kryeqytetit të Ukrainës këtë muaj, u rrëzuan nga sistemi mbrojtës ajror i Kievit, ka thënë të martën në mëngjes Serhiz Popko, shef i administratës ushtarake të qytetit të Kievit.

“Alarmi zgjati tri orë. Armiku përdori dronë iranianë, Shahed. Ky është sulmi i gjashtë me dronë në kryeqytet këtë muaj. Objektivat ajrore u identifikuan me kohë dhe u shkatërruan sapo iu afruan Kievit”, tha Popko, duke shtuar se nuk kishte viktima apo dëme gjatë sulmit.

Për një sulm të dështuar më dron u raportua edhe në rajonin qendror Cherkasy. Zyrtarët rajonalë nuk raportuan për viktima apo dëme.

Në Moskë, Ministria e Mbrojtjes e Rusisë tha në një komunikatë për media se dronët ukrainas tentuan një sulm ndaj anijeve patrulluese të saj në Detin e Zi, por sulmi dështoi.

“Forcat e armatosura ukrainase e kryen një sulm të pasuksesshëm gjatë natës me dy dronë detarë në anijen patrulluese ‘Sergei Kotov’”, tha Ministria ruse, duke shtuar se sulmi i dyshuar ndodhi rreth 370 kilometra larg portit Sevastopol.

Ky pretendim nuk është konfirmuar në mënyrë të pavarur.

Sergei Kotov është njëra prej anijeve më të reja luftarake të Rusisë, pasi iu dha marinsave vitin e kaluar.

LEXONI GJITHASHTU:

• Përshkallëzohen flakët në Kraps të Fierit, era favorizon zjarrin
• Përfundon takimi i studentëve të mjekësisë me Begajn: Ndryshe nga të tjerët, dëgjoi