Kodi i Ri Zgjedhor, Kristaq Kume: Faktor për gjenerimin e situatave të papëlqyeshme në procesin zgjedhor

Konstitucionalisti Kristaq Kume në një intervistë për Euronews Albania foli për ndryshimet në Kodin e Ri Zgjedhor, ku theksoi se kjo është hera e parë që këto ndryshime bëhen pa dakordësinë e të dyja palëve.

Në vlerësimin e tij, votimi i të hënës mund të jetë faktor për gjenerimin e situatave të papëlqyeshme në procesin zgjedhor.

Sa i përket mirëfunksionimit të listave të hapura, z. Kume theksoi se nuk i konsideron si një ndryshim i cili mund të sjellë benefite.

“Mundësitë për të pasur në Kuvendin e Shqipërisë kandidatë që do të vijnë aty nga votat preferenciale të zgjedhësve shqiptar janë shumë të vogla”, – tha ai.

I pyetur për qëndrimin e tij për pragun i cili sipas mazhorancës ju jep mundësi partive të vogla të futen sërish në parlament, Kristaq Kume theksoi se nuk është ajo forma e duhur se si duhet bërë një prag kombëtar.

Sipas tij, ky është thjesht një largim i partive të vogla nga kuvendi për interesa personale e nuk duhet bërë si ‘kungulleshka’ por duhet bërë mbi bazën e një analize.

“Vendosja e pragut kombëtar ashtu siç e kërkon tani kushtetuta e ndryshuar është në fund të fundit një vendimmarrje që merret mbi bazën e asaj çka klasa politike parashikon që të realizojë zhvillime të mëtejshme në strukturën politike të vendit”, – tha konstitucionalisti.

Vendosja e pragut 1% sot në Shqipëri do të thotë, nëse marrim parasysh pjesëmarrjen e votuesve në zgjedhjet e vitit 2017, një parti që të futet në përllogaritje për ndarjen e mandateve do t’i duhet që të marrë jo më pak se 16 mijë vota në nivel vendi”, – shtoi Kume, teksa tha se sipas mendimit të tij duke u bazuar dhe në zgjedhjet e kaluara këtë prag mund ta kalojë vetëm një parti.

Sipas z. Kume, vendosja e pragut 1% do ta bëjë legjitime hyrjen në tregun politik të një partie të re dhe për këtë arsye në këtë aspekt, ai e vlerëson pragun si një zgjidhje pozitive.

Së fundmi parë nga një këndvështrim tjetër, pragu mund të shihet dhe thjesht si një mundësi që Partia Socialiste po i jep vetes, PD-së dhe LSI-së për t’u lehtësuar nga efekti që mund të sjellin partitë e vogla në garën elektorale.

Lexoni gjithashtu: 

Si votuan deputetët për Kodin e ri Zgjedhor, kush ishte kundër

Votimi i Kodit Zgjedhor, Aleksandër Çipa tregon dy efektet e menjëhershme në sferën politike

Pas debatesh të ashpra, miratohet në parlament Kodi i ri Zgjedhor

Votimi i Kodit të ri Zgjedhor, SHBA-ja mesazh të qartë palëve politike

Pas SHBA, edhe Mbretëria e Bashkuar kritikon mungesën e konsensusit për Kodin Zgjedhor