Votimi i Kodit të ri Zgjedhor, Basha dhe Kryemadhi akuza kryeministrit Rama

Kryetari i Partisë Demokratike, Lulzim Basha e konsideroi “akt anti-kushtetues” që “shkatërron konsensusin e 5 qershorit” dhe “godet rëndë integrimin evropian” ndryshimin e ri të Kodit Zgjedhor sipas propozimeve të shumicës socialiste.

Përmes një postimi në Twitter, Basha tha se “Rama hodhi hapin e fundit drejt greminës”.

“Ai nuk do t’i marrë me vete Shqipërinë dhe shqiptarët. Asgjë nuk e shpëton dot atë nga humbja dhe ndëshkimi që e pret!,” – u shpreh kryetari i PD-së.

Akti i sotëm antikushtetues shkatërron konsensusin e 5 qershorit dhe godet rëndë integrimin europian të vendit. Rama e hodhi hapin e fundit drejt greminës. Por ai nuk do ti marrë dot me vete Shqipërinë dhe shqiptarët.Asgjë nuk e shpëton dot atë nga humbja dhe ndëshkimi që e pret!

— Lulzim Basha (@lulzimbasha_al) October 5, 2020

Pas miratimit të Kodit të ri Zgjedhor ka reaguar edhe kryetarja e Lëvizjes Socialiste për Integrim, Monika Kryemadhi. Përmes një deklarate për mediat, e para e LSI-së u shpreh se kryeministri Rama nuk pranoi të hapte listat zgjedhore pasi ka frikë nga verdikti i popullit.

Ajo thotë më tej se veprimi i sotëm në Parlament (votimi i Kodit të ri Zgjedhor) e distancon Shqipërinë dhe shqiptarët nga rruga europiane.

“Frikacaku tregoi dhe njëherë që ka frikë nga populli i tij, ka frikë nga verdikti i popullit të tij, frikacaku tregoi dhe njëherë që ka frikë nga partia e tij dhe mbi të gjitha ka frikë nga vota e lirë e shqiptarëve. Ai jo vetëm sot nuk hapi listat për qytetarët shqiptarë, por përkundrazi i bunkerizoi ato për të larguar njëherë e përgjithmonë dhe për të distancuar Shqipërinë nga integrimi europian dhe sidomos shqiptarët nga Europa”, tha Kryemadhi.

Lexoni gjithashtu: 

Parlamenti miraton KQZ-në e re, Ilirjan Celibashi zgjidhet kryetar

Pas debatesh të ashpra, miratohet në parlament Kodi i ri Zgjedhor

Ndryshimet e Kodit Zgjedhor, Rama: Koalicionet s’mund të jenë kope, sot ne do t’i qytetërojmë

Rudina Hajdari bllokon foltoren e Kuvendit: Ndërpriteni këtë seancë të turpshme, po mashtroni shqiptarët siç bëtë 30 vjet

Ndryshimet në kodin zgjedhor, Gjiknuri: Modeli ynë korrigjon çdo anomali, asnjë parti s’meriton fonde publike nëse nuk merr 1 % të votave