Kolegji vulos “25 prillin”, rrëzohen pretendimet për përsëritje të zgjedhjeve në të gjitha qarqet

Kolegji Zgjedhor ka vendosur rrëzimin e padive të Partisë Demokratike për qarqet e Fierit dhe Elbasanit, që kërkon përsëritjen e zgjedhjeve. Me këto dy vendimet të sotme, merr fund gjithë procesi ankimor për zgjedhjet e 25 prillit në Kolegj dhe mbetet për t’u parë se cila do të jetë hallka e radhës që do të ndjekë opozita për kontestimet për zgjedhjet e 25 prillit.

Masakër elektorale, blerje masive votash, intimidim i administratës, këto ishin vetëm disa nga termat qe PD dhe LSI i kanë përdorur për zgjedhjet e 25 prillit. Mbi bazën e këtyre pretendimeve, këto partitë opozitare nisën betejën ligjore për të kundërshtuar verdiktin e shpallur nga KQZ dhe për të përsëritur zgjedhjet.

Vendimet me të fundit ishin për qarqet e Fierit dhe Elbasanit, ku sërish Kolegji Zgjedhor la në fuqi atë çka më herët kishte vendosur Komisioni i Ankimimeve dhe Sanksioneve në KQZ.

Ndërkohë edhe pretendimet e Partisë Demokratike dhe LSI vijojnë të njëjtat, duke theksuar se as KAS dhe as Kolegji nuk kanë bërë drejtësi për zgjedhjet me vendimet që kanë marrë.

Përfaqësuesi ligjor i PD-së, Marash Logu tha se nga momenti i depozitimit te ankimimeve në KAS deri te vendimi i Kolegjit Zgjedhor, u morën 6 jave kohë. Por përballja ligjore mes PD-së dhe PD-së, sipas z. Logu, do të vijojë edhe në shkallët e tjera gjyqësore.

“PD bashkë me LSI kanë paralajmëruar dorëzimin e padive për parregullsitë në këto zgjedhje edhe në Gjykatën Kushtetuese, apo edhe Strasburg”, u shpreh Marash Logu.