Fleta e votimi do të jetë me numra, Kolegji Zgjedhor rrëzon kërkesën e PD

Kolegji Zgjedhor ka vendosur që fleta e votimit për zgjedhjet e 25 prillit të jetë me numra dhe jo me emrat e kandidatëve për deputetë. Trupa e Kolegjit Zgjedhor që mori vendim përbëhej nga relatorja Manjola Xhaxho dhe anëtarët Gentian Medja, Alma Kolgjoka, Esmeralda Çeka dhe Asim Vokshi.

Përfaqësuesi ligjor i PD, Ivi Kaso kërkoi që Kolegji Zgjedhor t’i përmbahet dispozitave të Kodit Zgjedhor për përcaktimin e modelit që do të përdoret në procesin zgjedhor që do të mbahet në fund të këtij muaji.

Ai tha se “konfigurimi duhet të jetë i qartë për zgjedhësit” dhe kjo nuk përmbushet me modelin e miratuar dje nga Komisioni i Ankimimeve dhe Sanksioneve pranë KQZ.

Ivi Kaso iu referua dhe një sondazhi të bërë nga KQZ ku 79% u shprehën në favor të një flete votimi ku të ishin të përfshirë emrat e kandidatëve ndërsa 21% morën të gjitha opsionet e tjera.

Por pavarësisht këtyre pretendimeve Kolegji Zgjedhor la në fuqi vendimin e KAS. Dje, Komisioni i Ankimimeve dhe Sanksioneve pranë KQZ rrëzoi fletën e votimit me emra e miratuar nga Komisoneri Celibashi, duke pranuar kërkesën e PS që kërkon një fletë votimi në të cilën kandidatët të identifikohen me numra.

Komisioni i Ankimimeve dhe Sanksioneve, në mbledhjen e kësaj të shtunë hodhi poshtë variantin e miratuar nga komisoneri Celibashi, duke pranuar kërkesën e PS që kërkon një fletë votimi në të cilën kandidatët të identifikohen me numra.