Komisioni i Etikës përjashton dy deputetë e Partisë Mundësia: Shehaj 30 ditë dhe Kapri 20 ditë

 Komisioni i Etikës në Kuvend ka vendosur të përjashtojë përkohësisht dy deputetë të Partisë Mundësia, Agron Shehaj dhe Erald Kapri, pas incidenteve të regjistruara në seancën plenare të së enjtes së kaluar.

Sipas vendimit, kreu i Partisë Mundësia, Agron Shehaj, është përjashtuar për 30 ditë nga pjesëmarrja në seancat plenare dhe në komisionet parlamentare, ndërsa deputeti Erald Kapri është përjashtuar për 20 ditë.

Masa disiplinore vjen pas akuzave se dy deputetët penguan zhvillimin normal të punimeve të Kuvendit gjatë seancës, duke bllokuar vijimin e rendit të ditës. Vendimi është marrë nga Sekretariati për Procedurat, Votimet dhe Etikën, pas shqyrtimit të kërkesës së paraqitur nga shumica parlamentare.

Ngjarja ka shtuar tensionet politike në Kuvend, ku përplasjet mes mazhorancës dhe opozitës janë shpeshtuar gjatë seancave të fundit.