Koncensioni i portit të Durrësit, PD akuzon qeverinë se ka shpallur fitues një kompani offshore të akuzuar për pastrim parash

Një ditë pas shpalljes së fituesit të tenderit 5-vjeçar për menaxhimin dhe operimin e Terminalit të Konteinerëve në portin e Durrësit, Partia Demokratike ka reaguar duke akuzuar kryeministrin Rama se po i jep me koncesion njërën nga kalatat e portit të Durrësit një kompanie ‘offshore’. 

Ish-deputetja Jorida Tabaku tha se kompania fituese ‘Hili Company Limited’ njihet ndërkombëtarisht për operacione të dyshimta nga skandali i “Panama Papers”.

Sipas saj, administratori i kësaj kompanie është hetuar në Maltë për pastrim parash.

E kontaktuar nga Euronews Albania, kompania mohoi akuzat e PD dhe tha se nuk është e përfshirë as ajo dhe as pronarët e saj në Panama Papers.  

“Edi Rama duhet të dalë sot para shqiptarëve dhe të thotë çfarë e detyroi të japë pasurinë e vendit, kalatën e Portit të  Durrësit, tek një kompani fantazmë”, akuzoi ish-deputetja demokrate Tabaku.

Sipas të dhënave të disponueshme në faqen online të Agjencisë së Prokurimit Publik, në garë kanë qenë dy kompani, Hili Company Limited dhe HHLA International Gmbh (e cila nuk ka paraqitur ofertë në fazën e dytë).

Autoriteti kontraktues e ka justifikuar shpalljen fituese të kompanisë Hili me arsyetimin e ofertës më të favorshme ekonomike. 

Euronews Albania kontaktoi për koment lidhur me akuzat e PD, Autoritetin Portual të Durrësit dhe Zyrën për Shtyp të kryeministrit Edi Rama. Ky artikull do të përditësohet në rast të kthimit të përgjigjes nga palët e akuzuara prej opozitës.

Tabaku paralajmëroi se PD do të hetojë dhe anulojë me prioritet koncesionin 30 milionë euro në Portin e Durrësit nëse del triumfuese nga zgjedhjet e 25 prillit.

Lexoni gjithashtu:

• Koncesioni i portit të Durrësit, kompania fituese reagon për Euronews Albania duke mohuar akuzat e Partisë Demokratike